ماهي التغذية اللازمة اثناء الحمل ؟
اي حاجة بتتاكل او تتشرب اثناء الحمل بتوصل للجنين وعلشان كدة لازم تختاري الاكل اللي يفيد طفلك في نموه وتطوره .
المرأه الحامل بتحتاج كمية اكبر من الكالسيوم والفوليك اسيد والحديد والبروتين .
حمض الفوليك
هو عبارة عن فيتامين ب وهو مهم جدا في الوقاية من التشوهات اللي بتحصل في مخ الجنين وعموده الفقري والجهاز العصبي للجنين .
وبيكون من الصعب الحصول على الكمية الكافية من حمض الفوليك من الاكل لوحده وعلشان كدة لازم اي واحده حامل تاخد حمض الفوليك يوميا .
حمض الفوليك بيبقى تركيزه عالي في الخضراوات الورقية زي السبانخ والفاصوليا الخضراء والخبز الاسمر
الكالسيوم
هو المعدن اللازم علشان تتطور عظام واسنان الطفل . ولو المرأه الحامل مكانتش بتاخد كفايتها من الكالسيوم فالطفل هياخد الكالسيوم اللي محتاجه من عظمها وسنانها .
المرأه الحامل بتحتاج تقريبا 1000 ملي جرام من الكالسيوم يوميا
الكالسيوم بيكون موجود في الالبان و الزبادي والجبنه و السردين والسالامون
الحديد
الحامل بتحتاج 27 ملي جرام من الحديد يوميا وده تقريبا ضعف الكمية عن المرأة غير الحامل . الحامل بتحتاج لمعادن اكتر علشان توصل الاوكسجين للجنين ولو الحامل موصلهاش كمية مناسبة من الحديد فده بيزود فرص حدوث الانيميا . وعلشان تتأكدي من امتصاص جيد للمعادن وبالذات الحديد لازم يكون مع الاكل فيتامين سي . ببساطة هي كباية عصير برتقال على الفطار مع اي اكل غني بالحديد .
الاكل الغني بالحديد زي اللحوم و الدواجن والاسماك والحبوب المجففة .
البروتين
المرأة بتحتاج كمية اكبر من البروتين اثناء الحمل وعاده البروتين مش بيشكل مشكلة لأي واحدة حامل لانها بتحصل عليه بسهولة في غذائها وده بيساعد على نمو الجنين و نمو قلب و مخ الجنين
الأغذية الغنية بالبروتين : زي اللحوم الحمراء و الدواجن والاسماك والفول و البيض
ايه الأكل اللي تركزي عليه في الحمل :
الهدف من الاكل اثناء الحمل انك تاكلي اكل غني بالقيم الغذائية طول الوقت وعلشان تقدري تعملي كدة لازم اكلك يكون في الخمس حاجات دي : الفاكهة – الخضراوات – اللحوم – الحبوب – منتجات الالبان
طريقة بسيطة علشان تضمني ان اكلك محتوي على العناصر دي ان طبقك هيتقسم بحيث ان نصه يكون خضار وفاكهه و ربع حبوب وربع بروتين ولازم يكون في اي حاجة من منتجات الالبان مع كل وجبة ( كوب لبن او زبادي )
الخضراوات والفواكه
لازم تركزي على الخضراوات والفواكه وخاصة في الثلث الثاني والثالث من الحمل . لان الفاكهة بتكون غنية بالالياف والفيتامينات والمعادن المفيده للجنين
اللحوم
لازم كل وجبة تحتوي على بروتين لان ده بيساعد على نمو الجنين . زي اللحوم والدواجن والاسماك والبيض والفول والجبن واللبن
الحبوب
من المصادر الغنية بالطاقة بالنسبة للحامل لانها بتزودها بالحديد وفيتامين ب . وحاولي ان الكاربوهيدرات اللي بتحصلي عليها تكون من الحبوب زي الشوفان والقمح والخبز الاسمر والارز الاسمر .
منتجات الالبان
من اهم مصادر الكالسيوم وفيتامين د زي اللبن والزبادي و الجبن
ايه الاكل اللي تبعدي عنه :
زي ما في حاجات لازم تركزي عليها في الاكل وانتي حامل في حاجات لازم تبعدي عنها زي :
الكافيين
لا يزيد عن كوب صغير في مرة واحدة في اليوم .
الاسماك
الاسماك بصفة عامة هي مصدر مهم للبروتين زي السالمون و السردين وكمان بيحتوي على زيت اوميجا 3 وده كويس علشان القلب . ولكن في انواع من الاسماك حاولي تبعدي عنها زي التونا البيضا لان فيها نسبة زئبق عالية بتضر الجنين ولكن التونة المعلبة نسبة الزئبق فيها بتكون قليلة ومفيش منها مشكلة
الكحوليات
لازم طبعا تتجنبي المشروبات الكحولية اثناء الحمل لانها بتوصل للجنين وممكن تسبب مشاكل في نموه وتصرفاته بعد كدة
الاطعمة الخارجية
زي اللبن اللي مش معلب ( مش متبستر ) يعني مش متسخن كويس علشان نقتل كل البكتريا اللي فيه
الهوت دوج والبسطرمة والسوسيس الا لو اتأكدتي انهم مطبوخين كويس علشان نقتل البكتريا اللي فيهم
الاكل اللي بيكون مش متسخن كويس حاولي تتجنبيه زي اللانشون والسوشي والمحار
بعض المعتقدات الخاطئة
في شوية حاجات كدة غلط في غلط
زي مثلا انك لما تصحي الصبح تلاقي نفسك حاسة بدوخة ودوار فتفتكري انك لو ما اكلتيش هتحسي بتحسن … لا يا ست الكل . الدوخة اللي بتيجيلك الصبح دي سببها ممكن يكون تغير في الهرومونات او انخفاض مستوى السكر في الدم وده ممكن يسببلك غثيان مع ميل للقئ خاصة في الشهور الاولى من الحمل .
وعاده الموضوع ده مش بيحصل بالنهار بس .. لا ده ممكن يحصل في اي وقت خلال اليوم وافضل علاج ليه انك تاكلي حاجة بسيطة بس ما يكونش ليها ريحة نفاذه علشان الروائح ممكن تتعب معدتك .
الوحم
الوحم من الحاجات المشهورة في الحمل وهو عبارة انك تكوني مشدودة لنوع معين من الاكل او نفسك مسدودة عن نوع تاني من الاكل …. من الاكلات المشهورة في الوحم زي السكريات الموالح واللحوم او المشروبات . والوحم بيعرفك انتي جسمك محتاج لإيه يعني لو نفسك في مشروبات يبقى انتي جسمك محتاج سوائل
أنا باكل كدة علشان احنا اتنين
لا يا فندم مش معنى كدة انك تضاعفي كمية الاكل !!! في اول الحمل انتي اكلك زي اللي مش حامل تقريبا لاننا مش عايزين زيادة في الوزن في المراحل الاولى من الحمل
لكن في الثلث الثاني من الحمل بتزودي 200 كالوري عن الثلث الاول
وفي الثلث الثالث هتزودي 300 كالوري عن الثلث الثاني
كيف تتجنبين زيادة وزنك اثناء الحمل ؟
الزيادة في الوزن بتتغير اثناء الحمل لاننا مبنكونش عارفين الوزن ده بيكون عبارة عن دهون او مياه او وزن الجنين نفسه وعلشان كدة متركزيش مع الميزان قوي ولكن ركزي اكتر مع النمو بتاع الجنين
زيادة وزنك في الحمل بتعتمد على عوامل كتير منها طولك ووزنك قبل الحمل و نشاطك الحركي ببساطة كدة انتي المفروض تزيدي مع نهاية الحمل (11.3 الى 18 ) كيلو عن وزنك قبل الحمل بيتقسموا ازاي : في اول تلات شهور بتزيدي من (0.5 الى 2 ) كيلو جرام وبعد كدة بتزيدي حوالي نصف كيلو جرام اسبوعيا في الثلث الثاني والثالث من الحمل
طبعا لو توأم الزيادة بتكون ( 16.7 الى 24.5 ) كيلو جرام في نهاية الحمل